यसकै कारण निष्त्रिmय कर्जा बढ्छ - गभर्नर

काठमाडौ, पुस ७ - घरजग्गा क्षेत्रमा देखिएको समस्याका कारण बैंक तथा वित्तीय संस्थाको निष्त्रिmय कर्जा बढ्ने गभर्नर युवराज खतिवडाले बताएका छन् । 'अस्वाभाविक मूल्य बढेको थियो,' ऋण असुली न्यायाधिकरणले आयोजना गरेको कार्यक्रममा उनले भने, 'त्यसले पहिलेको असल धितो अहिले आएर खराब पनि हुन सक्छ ।' निष्त्रिmय कर्जा र वित्तीय अपराध बढ्ने भएपछि नियमकारी निकाय चनाखो रहनुपर्ने उनले बताए । 'राष्ट्र बैंकले पछिल्लो समयमा वित्तीय सुशासनका क्षेत्रमा चालेको कदमले सुधारको क्रम सुरु भएको छ,' उनले भने ।
अर्थसचिव कृष्णहरि बाँस्कोटाले बैंकिङ क्षेत्रमा विश्वसनीयता नबढेसम्म अर्थतन्त्रमा सुधार हुन नसक्ने बताए । 'पछिल्लो समयमा अर्थतन्त्रका सूचकमा सुधार आएको छ,' उनले भने, 'यसलाई यथावत् राख्नु जरुरी छ ।' दण्डहीनता विरुद्ध सरकारले कठोर कदम चाल्ने दाबी उनले गरे ।
बैंक तथा वित्तीय संस्थाको खराब कर्जा असुलीका लागि गठन भएको ऋण असुली न्यायाधिकरणमा आर्थिक वर्ष २०६७/०६८ सम्म २ हजार ५ सय ९८ वटा मुद्दा परेका छन् । यीमध्ये ८५ दशमलव २२ प्रतिशत मुद्दा फैसला भइसकेको छ । 'हामीले ५ लाखभन्दा बढी साँवा भएका ऋणको काम गरिरहेका छौं,' ऋण असुली न्यायाधिकरणका अध्यक्ष गोकुलप्रसाद बुर्लाकोटीले भने, 'समस्यासँगै धेरै चुनौती पनि छन् ।' बैंक तथा वित्तीय संस्थाबाट ऋण लिएर विदेश भाग्ने र जमानी बसेका समेत बिदेसिनाले समस्या रहेको उनले बताए । 'बैंकहरूले चासो दिए विदेश भागेकालाई पनि सजिलै सम्पर्क गरेर ल्याउन सकिने देखिन्छ,' उनले भने ।