आइएमईको ७४ करोडको प्रवर्द्धक सेयर कारोबार

काठमाडौ, पुस ११ - आइएमई फाइनान्सियल इन्स्िटच्युसनको सोमबार ३ लाख ६० हजार कित्ता सेयर कारोबार भएको छ । २ सय ८ रुपैयाँ प्रतिकित्ता मूल्यमा ७४ करोड ८८ लाख रुपैयाँको कारोबार भएको हो । अघिल्लो कारोबार भन्दा ४ रुपैयाँ कम मूल्यमा खरिद बिक्री भएको छ । संस्थाका अनुसार पुरानै प्रवर्द्धक बीच खरिद बिक्री भएको हो । 

यो कारोबारका कारण नेपाल स्टक एक्सचेन्जको कुल कारोबार रकम पनि १३ करोड १८ लाख रुपैयाँ पुग्यो । परिसूचक भने ० दशमलव ४४ अंकले घटेर ३ सय १२ दशमलव ४९ बिन्दुमा झरेको छ । वाणिज्य बैंक समूहमा आएको गिरावटका कारण परिसूचक पनि घटेको हो । यो समूह १ दशमलव १५ अंकले घटेको छ । विकास बैंक, जलविद्युत्, वित्त र बिमा समूहमा भने सुधार भएको छ । सबैभन्दा बढी बिमा समूह ३ दशमलव ३४ अंकले बढेको छ ।

सोमबार लामो समयपछि प्रवर्द्धक सेयरको ठूलो मात्रामा कारोबार भएको छ । संस्थामा रहेकै लगानीकर्ता बीच खरिद बिक्री भएको आइएमई स्रोतले बतायो । 'कम्पनीमै आबद्ध व्यक्तिले खरिद बिक्री गरेका हुन्,' कम्पनी स्रोतले भन्यो, 'नया लगानीकर्ताको प्रवेश भएको होइन ।' मर्जरका लागि उपयुक्त संस्थाको खोजी भइरहेको पनि स्रोतले बतायो । 'केही प्रस्ताव आएका छन्,' उनले भने, 'उपयुक्त कम्पनी छनोट गरेर मर्जरमा जान्छौं ।'
आइएमई बाहेक चिलिमे हाइड्रो पावर, नेपाल बंगलादेश बैंक, बैंक अफ काठमाडौं र एलआइसी नेपालका सेयरको बढी कारोबार भएको छ ।