डलर ८५ नाघ्यो

काठमाडौ, मंसिर २७ - अमेरिकी डलरको मूल्य बढ्दै गएर ८५ रुपैयाँ नाघेको छ । राष्ट्र बैंकले बुधबारका लागि तोकेको विनिमय दर अनुसार डलरको बिक्री दर ८५ रुपैयाँ ६९ पैसा पुगेको छ । खरिद दर ८५ रुपैयाँ ०९ पैसा पुगेको छ । यो हालसम्मकै उच्च मूल्य हो ।
युरोपमा जारी आर्थिक संकटका कारण अमेरिकी डलरको माग बढेकाले भाउ बढेको हो । डलरको मूल्य बढ्दा आयात हुने अधिकांश वस्तुको मूल्य बढ्ने गर्छ । निर्यात हुने वस्तुले भने राम्रो मूल्य पाउँछन् । डलरको मूल्य बढ्न थालेपछि मुलुक भित्रिने रेमिट्यान्समा पनि वृद्धि हुन थालेको छ । बढी मूल्य हुने भएपछि डलरमा लगानी बढ्ने सम्भावना पनि रहन्छ । आयात भएका वस्तुको मूल्य भने २० प्रतिशतसम्म बढेको व्यवसायी बताउँछन् ।
भारतसँग रहेको स्थिर विनिमय दरका कारण डलरमा पनि असर पर्छ । भारतले डलरको अधिमूल्यन -बढ्दो भाउ) रोक्न हस्तक्षेप नगरेसम्म नेपालमा पनि यो वृद्धि भइरहने देखिन्छ । भारत सरकारले डलरमाथि तत्काल हस्तक्षेप गर्ने अवस्था आइनसकेको बताउँदै आएको छ । डलर महँगो भएपछि भारतले निर्यात बढाउने र व्यापार घाटा कम गर्ने अवसर पाएको छ । साथै मूूल्य वृद्धि बढिरहेको छ । नेपालको कुल आयातमा करिब ६५ प्रतिशत भारतबाट हुने गरेको छ ।