नबिलले अवकाश कोष व्यवस्थापन सेवा सुरु गर्ने

काठमाडौ, मंसिर २६ - नबिल इन्भेस्टमेन्ट बैंकिङले कर्मचारी सञ्चय कोष जस्तै अवकाश कोष व्यवस्थापन (रिटायर्डमेन्ट फन्ड म्यानेजमेन्ट) सेवा सुरु गर्ने भएको छ । नबिल बैंकको सहायक संस्थाका रूपमा रहेको यस कम्पनीले सञ्चालनका लागि सरकारसँग अनुमति मागेको छ । 'सेवा सञ्चालनका लागि आवश्यक तयारी गरिरहेका छौं,' नबिल बैंकका प्रमुख लगानी अधिकृत भुवन दाहालले भने, 'नबिल इन्भेस्टमेन्ट अन्तर्गत वा छुट्टै कम्पनी खोलेर सेवा दिने योजनामा छांै ।' 

हाल अवकाश कोष योजना कर्मचारी सञ्चय कोषले मात्र सञ्चालन गरिरहेको छ । सञ्चय कोषसँग विभिन्न संस्थामा कार्यरत कर्मचारीको १ खर्ब २ अर्ब ४१ करोड रुपैयाँ छ । ४५ लाख कर्मचारी आबद्ध कोषमा २८ हजार कार्यालयले सुविधा लिइरहेका छन् । ठूलो बजार हुनुका साथै प्रतिस्पर्धी नभएकाले नबिल बैंकले सहायक कम्पनी मार्फत यस्तो सेवा सुरु गर्ने तयारी गरेको हो ।

कोष सञ्चालन गर्नका लागि १ करोड रुपैयाँ चुक्ता पुँजी र १ हजार ग्राहक आवश्यक हुन्छ । इन्भेस्टमेन्ट बैंकिङको १० करोड रुपैयाँ चुक्ता पुँजी भएकाले सेवा सञ्चालन गर्न सकिने दाहालले बताए । नबिलले अवकाश कोष मार्फत सञ्चय कोषले जस्तै विभिन्न कम्पनीमा कार्यरत कर्मचारीलाई योजना बिक्री गर्ने छ । निजी तथा सरकारी सेवामा कार्यरत कर्मचारीले योजनामा सहभागी हुन पाउने छन् । योजना अनुसार रोजगार रहेको समयमा तलबको निश्चित रकम कोषमा जम्मा हुने छ । अवकाश पाएपछि उक्त रकम एकमुष्ट फिर्ता दिने वा पेन्सनका रूपमा आजीवन प्रदान गर्ने योजना कम्पनीले ल्याउने जनाएको छ । 'अन्तर्राष्ट्रिय मान्यता अनुरूपका सबै अवकाश कोषका योजना हामीले लागू गर्ने तयारी गरेको हौं,' दहालले भने ।

यससँगै बैंकले विदेशमा शाखा खोल्ने पुरानो योजनालाई पनि अघि बढाएको छ । २००८ मा बैंकले लिएको ५ वर्षे रणनीतिक योजना अनुरूप विदेशमा शाखा खोल्नका लागि काम अघि बढाइएको थियो । यसका लागि बैंकमा 'अन्तर्राष्ट्रिय बैंकिङ युनिट' ले काम गरिरहेको दाहालले बताए । उक्त युनिटले २००८ मै भुटानमा शाखा खोल्नका लागि सबै अध्ययन पूरा गरे पनि अन्तिम समयमा रोकिएको थियो । भुटानको केन्द्रीय बैंकले थप वाणिज्य बैंक र विदेशीको शाखा खोल्न नदिने नीति लिएपछि काम रोकिएको थियो ।

'हामी दक्षिण एसियाली मुलुकमा साझेदारी, शाखा वा प्रतिनिधि कार्यालय खोल्नका लागि अध्ययन गरिरहेका छौं,' दाहालले भने, 'विभिन्न मुलुकको अध्ययन भइरहेको छ ।' कम्बोडिया, भियतनाम, बर्मा लगायत मुलुकका प्रावधानबारे बैंकले अध्ययन गरिरहेको हो । विदेशमा शाखा खोल्नका लागि पुँजी वृद्धि आवश्यक हुन सक्ने भएकाले यस सम्बन्धी तयारी पनि बैंकले गरेको छ । 'बोन्ड जारी गरेर पुँजी बढाउने काम अघि बढाउँछौं,' दाहालले भने ।

नबिल इन्भेस्टमेन्टलाई सम्पूर्ण इन्भेस्टमेन्ट कम्पनीको काम गर्ने संस्थाका रूपमा अघि बढाउने योजना बैंकले लिएको छ । पोर्टफोलियो व्यवस्थापनको काम गरिरहेको इन्भेस्टमेन्टले सामूहिक लगानी कोषका लागि पनि आवेदन दिएको छ ।

नबिल बैंकमा सबैभन्दा ठूलो लगानी रहेको एनबी इन्टरनेसनलका बंगलादेशी कन्ट्री म्यानेजर माहियुद्दिन अहमदले बैंक रणनीतिक योजना अनुसार अघि बढिरहेको बताए । 'बैंकको व्यवस्थापनबाट सबै सन्तुष्ट छौं,' उनले भने, 'स्थानीय विशेषज्ञ सामेल भएकाले बैंकले अझै उचाइ लिने छ ।' मर्जरको कुनै सोच नबनाए पनि 'भ्यालु एड' हुने भए यसबारे सोच्न सकिने उनी बताउँछन् ।

बैंकले इन्भेस्टमेन्ट बैंकिङ, बैंकास्योरेन्स, रेमिट्यान्स, जलविद्युत् इकाई लगायतमा विशेष ध्यान दिने योजना बनाएको छ । यसका साथै बैंकले मोबाइल बैंकिङलाई पनि परिर्माजित गर्नेे भएको छ । 'अन्य बैंकसँग पनि जोडिने गरी मोबाइल बैंकिङको काम गर्ने तयारीमा छौं,' दहालले भने । सूचना प्रविधि र ग्राहक सेवामा ध्यान पुर्‍याउने योजना सुरु भइसकेको उनी बताउँछन् ।

बैंकले दिएको तथ्यांक अनुसार एनबी इन्टरनेसनलले १९९९ मा नबिलको ५० प्रतिशत सेयर खरिद गरेको हो । त्यसयता बैंकको खुद नाफा ४ सय २ प्रतिशतले बढेको छ । यही अवधिमा निक्षेप ४ सय २५, ऋण लगानी ५ सय ७२ प्रतिशतले बढेका छन् । गत आर्थिक वर्षमा बैंकले १ अर्ब ३३ करोड रुपैयाँ खुद नाफा गरेको थियो । नबिल विदेशी संयुक्त लगानीमा स्थापित मुलुकको पहिलो वाणिज्य बैंक हो ।