ब्राजिलको अर्थतन्त्र युके भन्दा अगाडी

युरोपियन भन्दा एसियाली अर्थतन्त्रको अवस्था सुध्रदै
बेलायत (एजेन्सी)– युकेको अर्थतन्त्रलाई ब्राजिलले उछिनेर विश्वको छैठो ठूलो बनेको छ । एक आर्थिक अनुसन्धान समूहको अध्ययनले यस्तो देखाएको हो ।
सेन्टर फर इकोनोमिक एन्ड बिजनेश रिर्सच (सीइबीआर) ले सार्वजनिक गरेको विश्वका अर्थतन्त्रको स्थान देखाउने टेबलमा एसियाली मुलुक माथिल्लो स्थानमा उक्लिन थालेको देखिन्छ । युरोपियन मुलुक भने तल झर्ने क्रममा छन् ।
अध्ययनले युरोजोन क्षेत्रको समस्या समाधान भए २०१२ मा अर्थतन्त्र ० दशमलव ६ प्रतिशतले मात्र घट्ने अनुमान गरेको छ । समाधान हुन नसके २ प्रतिशतको गिरावट आउने प्रक्षेपण गरिएको छ ।
सीइबीआरका प्रमुख कार्यकारी डोग्लास म्याकविलियस्मले बिबिसि रेडियो फोरलाई ब्राजिल उक्लनु पछिल्लो प्रवृत्तिको उदाहरण भनेका छन् । ‘यो ठूलो आर्थिक परिवर्तनको सूचक हो’ उनले भने,‘जहा वृद्धिदर पश्चिमी मुलुकमा भन्दा पूर्व तर्फ बढी भैरहेको छ ।’ खाद्यान्न र उर्जा उत्पादक मुलुकको अर्थतन्त्र भने विस्तारै सुधारको क्रममा देखिएको उनले बताए ।
अन्तराष्ट्रिय मुद्रा कोषले पछिल्लो समय सार्वजनिक गरेको अध्ययनमा २०११ मा ब्राजिलले युकेलाई उछिन्ने उल्लेख थियो । ब्राजिलको अर्थतन्त्र गत वर्ष ७ दशमलव ५ प्रतिशतले बढेको थियो । सरकारले २०११ मा भने ३ दशमलव ५ प्रतिशत बढ्ने बताएको छ । युरो क्षेत्रमा आएको समस्या र बढ्दो व्याजदरका कारण ब्राजिलले वृद्धिदरको कम प्रक्षेपण गरेको हो । ब्राजिलले चीनबाट आयात गर्ने सामान भन्दा बढी निर्यात गर्ने गर्छ । तर व्यवासायी चीनको सस्तो उत्पादनबाट पिडित हुन थालेको बताउने गर्छन ।
रसिया पनि एक स्थान उक्लिएर नवौ भएको छ । २०२० सम्ममा यो चौथो ठुलो अर्थतन्त्र हुने अनुमान गरिएको छ । हाल १० औं स्थानमा रहेको भारत २०२० मा पाचौ स्थानमा आउने अनुमान छ ।