११ महिनामा ६८ अर्ब रुपैयाँको पेट्रोलियम आयात

काठमाडौ, श्रावण १३ - गत आर्थिक वर्षको ११ महिनामा सबैभन्दा धेरै रकम खर्चिएर मुलुकले पेट्रोलियम पदार्थ आयात गरेको छ । राष्ट्र बैंकद्वारा सार्वजनिक तथ्यांक अनुसार जेठसम्ममा ६८ अर्ब १६ करोड रुपैयाँ बराबरको पेट्रोलियम पदार्थ आयात भएको छ । अघिल्लो वर्षको सोही अवधिको तुलनामा यो ४८ दशमलव २ प्रतिशत बढी हो ।
भारतबाट आयात भइरहेको पेट्रोलियम पदार्थले व्यापार घाटा वृद्धि गर्न पनि सहयोग गरेको छ । गत आर्थिक वर्षको ११ महिनामा भारतसँगको व्यापार घाटा २२ दशमलव ८ प्रतिशतले बढेको छ । अन्य मुलुकबाट भएको आयात भने १७ दशमलव ६ प्रतिशतले घटेको छ । पेट्रोलियम पदार्थको निर्भरता कम गर्न बजेटले जलविद्युत्, वैकल्पिक ऊर्जा लगायत क्षेत्रलाई प्रोत्साहन गर्ने उल्लेख गरेको छ ।
दोस्रो धेरै रकमको आयात हुने वस्तुमा फलाम र स्टिल परेको छ । तथ्यांकअनुसार जेठसम्ममा २१ अर्ब ७९ करोड रुपैयाँको फलाम र स्टिल आयात भएको थियो । यीबाहेक सवारीसधान र पाटपुर्जा, मेसिनरी र औषधिको आयात पनि उच्च छ । यी सामान ३३ अर्ब र औषधिमा १० अर्ब ९० करोड रुपैयाँ खर्च भएको छ ।
राष्ट्र बैंकको तथ्यांकले मुद्रास्फीति घट्दै गएको देखाएको छ । ०६७/६८ को जेठमा वाषिर्क बिन्दुगत उपभोक्ता मुद्रास्फीति ८ दशमलव ८ प्रतिशत छ । वैशाखसम्मको १० महिनामा ९ दशमलव ५ प्रतिशत थियो ।
अघिल्लो वर्षको सोही अवधिमा यस्तो मुद्रास्फीति ८ दशमलव २ प्रतिशत  थियो । सबैभन्दा बढी खाद्य तथा पेय पदार्थको मूल्य वृद्धि भएको छ । जेठसम्मा यो समूहको मूल्य वृद्धि १४ दशमलव ३ प्रतिशत छ । गैरखाद्य तथा सेवा समूहको मूल्य सूचकांक भने ४ दशमलव ३ प्रतिशतले बढेको छ ।
मूल्यसँगै तलब पनि वृद्धि भएको तथ्यांकमा उल्लेख छ । वाषिर्क बिन्दुगत राष्ट्रिय तलब तथा ज्यालादर सूचकांक २३ दशमलव ३ प्रतिशतले बढेको छ । अघिल्लो वर्षको सोही अवधिमा यो सूचकांक १३ दशमलव ४ प्रतिशतले बढेको थियो ।