नयाँ सेयर दलालको काम सिडिएससँगै सुरु हुने

काठमाडौ, अषाढ २७ - नस्टक एक्सचेन्जले नयाँ सेयर दलाललाई केन्द्रीय निक्षेप प्रणाली (सिडिएस) सञ्चालनमा आएपछि कारोबार सुरु गर्न दिने तयारी गरेको छ । हाल कारोबार गरिरहेका २३ सँगै नयाँ २७ थपेर सेयर दलाल संख्या ५० पुर्‍याउने योजना छ ।

'साउनबाट सुरु हुने भनिएको सिडिएससँगै नयाँ प्रणालीमा काम गराउने लक्ष्य छ,' नेप्सेका अध्यक्ष टंक पनेरूले भने, 'यसका लागि आवश्यक काम गरिरहेका छौं ।'

नेप्सेका महाप्रबन्धक शंकरमान सिंहले ह्रासोन्मुख बजारमा सुधार ल्याउन सेयर दलालले पनि भूमिका खेल्नुपर्ने बताए । 'नयाँ पुस्ता प्राविधिक दृष्टिकोणले सबल हुनुहुन्छ,' उनले भने, 'यसबाट ग्राहकले उच्च व्यावसायिक सेवा पाउनु आशा गरेका छौं ।'

स्टक ब्रोकर एसोसिएसनका अध्यक्ष अञ्जनराज पौडेलले नयाँ दलालबाट बजार विस्तारमा थप योगदान पुग्ने बताए । 'बजारमा संख्या थपिँदा नियमनको समस्या भने देखिनु हुँदैन भन्ने कुरा ध्यान राख्नु जरुरी छ,' उनले भने ।

धितोपत्र बोर्डले कारोबार अनुमति दिएको १४ सेयर दलाललाई नेप्सेले आइतबार सदस्यताको प्रमाणपत्र दिएको छ । सदस्यता पाउनेमा दक्षिणकाली इन्भेस्टमेन्ट एन्ड सेक्युरिटिज, भिजन सेक्युरिटिज, कोहिनुर इन्भेस्टमेन्ट एन्ड सेक्युरिटिज, सेक्युर्ड सेक्युरिटिज, स्वर्णलक्ष्मी सेक्युरिटिज, दीपशिखा धितोपत्र कारोबार कम्पनी, सुमेरु सेक्युरिटिज, क्रियटिभ सेक्युरिटिज, लिन्च स्टक मार्केट, सनी सेक्युरिटिज कम्पनी, साउथ एसियन बुल्स, डाइनामिक मनी म्यानेजर सेक्युरिटिज, इम्पेरियल सेक्युरिटिज कम्पनी र कालिका सेक्युरिटिज छन् ।