काठमाडौ, श्रावण १२ - क्यापिटल मर्चेन्ट बैंकिङ एन्ड फाइनान्सका पूर्वअध्यक्ष विज्ञानप्रसाद पौडेललाई प्रहरीले पक्राउ गरेको छ । बुधबार केन्द्रीय अनुसन्धान ब्युरोले बैंकिङ कसुरमा उनलाई कुपन्डोलबाट पक्राउ गरेको हो ।
करिब १ अर्ब ४२ करोड रुपैयाँ बराबरको ऋण प्रवाह गर्दा रीत नपुर्याएको भन्दै उनलाई बैंकिङ कसुरअनुसार पक्राउ गर्न राष्ट्र बैंकले प्रहरीलाई आग्रह गरेको थियो । ८५ वषर्ीय पौडेल राष्ट्र बैंककै पूर्वकर्मचारी हुन् ।
करिब १० वटा परियोजनामा लगानी गर्दा उनले अनियमितता गरेको अध्ययनमा देखिएको छ । नक्कली परियोजना बनाई र वास्तविकमा पनि आशिंक मात्र लगानी गरी अन्य रकम दुरुपयोग गरेको आरोप उनलाई लगाइएको छ । बैंकिङ कसुर तथा सजाय ऐन २०६४ को ७, ८, ९, १२ र १४ लगायतका दफाहरू अन्तर्गत कारबाही गरिने सिआइबीद्वारा जारी विज्ञप्तिमा उल्लेख छ ।
हाल उनलाई महानगरीय प्रहरी परिसर काठमाडौंमा राखिएको छ । यसअघि सिआइबीले यस कम्पनीका संस्थापक अमिरजंग खड्का र सेयरधनी जानुका केसीलाई पक्राउ गरेको थियो ।
संस्थामा देखिएको समस्याका मुख्य जिम्मेवार पवनकुमार कार्की भने हाल फरार छन् । प्रायः सबै अनियमितताका योजनाकार मानिएका कार्की हाल अमेरिकामा रहेको अनुमान छ । ब्युरोले खोजी जारी राखे पनि उनी मुलुकबाट फारार भइसकेको स्रोतले बताएको छ । उनलाई नक्कली ऋण प्रवाह, कर्जामा अनियमितता लगायत विभिन्न अभियोग लगाइएको छ ।
असारको पहिलो साता संस्थामा चरम तरलता अभाव भएपछि केही दिन शाखा बन्द गरेपछि अनियमितता बाहिर आएको थियो । राष्ट्र बैंकले गरेको स्थलगत अध्ययनबाट अनियमितता र घरजग्गा क्षेत्रमा धेरै लगानी भएको खुलेपछि ठूला निक्षेपकर्ताले पैसा झिकेका थिए । एकैपटक धेरै ठूला निक्षेपकर्ताले पैसा झिकेर तरलता अभाव देखिएको थियो । संस्थागत सुशासन अभाव देखिएपछि राष्ट्र बैंकले तुरुन्तै पुनर्कर्जा उपलब्ध गराएको थिएन ।
यसबाहेक गोर्खा विकास बैंकका तत्कालीन कार्यकारी अध्यक्ष डिबी बम्जन, युनाइटेड विकास बैंकका पूर्व कार्यकारी अध्यक्ष रवीन्द्रबहादुर सिंह र सञ्चालक राधाकृष्ण अमात्य, सम्झनाका तत्कालीन कार्यकारी अध्यक्ष श्यामबहादुर श्रेष्ठ र प्रमुख कार्यकारी अधिकृत हिमबहादुर गुरुङ पक्राउ परिसकेका छन् भने अझै विभिन्न संस्थाका गरी २७ जनालाई प्रहरी खोजिरहेको छ ।
No comments:
Post a Comment