बैंक सञ्चालकले ऋणको स्वघोषणा गर्नुपर्ने

काठमाडौ, श्रावण १३ - बैंक तथा वित्तीय संस्थाका सञ्चालकले आफ्नो वा परिवारका साथै व्यक्तिगत वा पारिवारिक स्वामित्व वा नियन्त्रणमा रहेको संस्थाले अन्य बैंक तथा वित्तीय संस्थाबाट लिएको ऋणको स्वघोषणा गर्नुपर्ने भएको छ ।

यस्तो घोषणा सञ्चालक संलग्न वित्तीय संस्थाको वाषिर्क प्रतिवेदनमा उल्लेख गर्नुपर्ने व्यवस्था गरिएको हो । मौदि्रक नीतिमा गरिएको यो व्यवस्थाबारे बिहीबार राष्ट्र बैंकले निर्देशन जारी गरेको छ । 

यसअघि सञ्चालकले ५० प्रतिशतभन्दा बढी प्रवर्द्धक सेयर धितो राखेर ऋण लिन नमिल्ने व्यवस्था गरिएको थियो । तर सर्वोच्च अदालतको अन्तरिम आदेशले यसलाई लागू नगर्न भनेको थियो । यसका साथै उत्पादनशील क्षेत्रको कर्जा बढाउन पनि विशेष व्यवस्था गरिएको छ । यसअनुसार तीन वर्षभित्र बैंक तथा वित्तीय संस्थाले कुल लगानीको २० प्रतिशत उत्पादनशील क्षेत्रमा लगाउनु पर्ने छ । यसका लागि अर्धवाषिर्क लक्ष्य निर्धारण गरेर सञ्चालक समितिले समीक्षा गर्न निर्देशन दिइएको छ । यस्तो लगानीको अवस्था अर्धवाषिर्क अवधि समाप्त भएको एक महिनाभित्र राष्ट्र बैंकमा बुझाउनुपर्ने छ ।

राष्ट्र बैंकले तोकेको ९ वित्तीय सेवाको पहुँच भएका जिल्लामा घ वर्गका वित्तीय संस्थाले शाखा खोलेर कारोबार गरे प्रतिशाखा शून्य ब्याजदरमा कर्जा सुविधा दिने भएको छ । यस्तो सेवा उपलब्ध हुने ९ जिल्लामा मनाङ, हुम्ला, डोल्पा, कालिकोट, मुगु, जाजरकोट, बझाङ, बाजुरा र दार्चुलालाई राखिएको छ ।