सञ्चालक समितिलाई नयाँ सेयर संरचना पठाउन निर्देशन

काठमाडौ, श्रावण १० - राष्ट्र बैंकले मध्यमाञ्चल ग्रामीण विकास बैंकको सञ्चालक समितिलाई तीन महिनाभित्र नयाँ सेयर संरचना पठाउन निर्देशन दिएको छ । तत्कालीन संरचनामा बैंक चल्न नसक्ने देखिएपछि नयाँ संरचना पठाउन निर्देशन दिइएको हो ।
'सोमबार पत्र पठाएर नयाँ सेयर संरचना माग गरेका छौं,' राष्ट्र बैंकका प्रवक्ता भाष्करमणि ज्ञवालीले भने, 'बैंक कसरी चल्छ वा चल्दैन भन्ने खुलाएर प्रतिवेदन माग गरेका हौं ।'
एक वर्षदेखि नियन्त्रणमा लिएको भए पनि केही समयअघि राष्ट्र बैंकले नयाँ सञ्चालक समिति गठन गराएको छ । नयाँ सञ्चालक समितिमा राष्ट्र बैंक जनकपुरका व्यवस्थापकसहित दुई संस्थागत र दुई सर्वसाधारण सेयरधनी छन् । संस्थागतका तर्फबाट नेपाल बंगलादेश बैंक र बैंक अफ काठमाडौंका एक/एक सञ्चालक चुनिएका हुन् । संचालक समितिले व्यवस्थापनको वरिष्ठ अधिकृतलाई कार्यकारी अधिकृत नियुक्त गर्नुपर्ने छ । बैंकमा सबैभन्दा ठूलो संस्थागत लगानीकर्ता बन्दीपुर सहकारी देखिए पनि सञ्चालक समितिमा भने सामेल गरिएको छैन । सहकारी युनिटी लाइफ इन्टरनेसनलको काण्डमा मुछिएपछि सञ्चालक समितिभन्दा बाहिर राखिएको हो ।
राष्ट्र बैंकका उपनिर्देशकको संयोजकत्वमा बनेको समितिले एक वर्ष नियन्त्रणमा लिएर संस्थाको विस्तृत वित्तीय विवरण -डिउ डिलिजेन्स अडिट) गराएको थियो । जसले संस्थाको अवस्था नाजुक अवस्थामा देखिएको राष्ट्र बैंक स्रोतले बतायो । 'बैंकको अवस्था सन्तोषजनक देखिँदैन,' स्रोतले भन्यो । संस्थामा ३० प्रतिशत सर्वसाधारणको निक्षेप छ । 

राष्ट्र बैंकले २०६७ जेठमा स्थलगत निरीक्षण गर्दा स्वीकृति नलिई संस्थापक समूहको स्वामित्वमा रहेको सेयर बिक्री गरेको, युनिटी टावर ललितपुरमा सुपरिवेक्षण तथा समन्वय कार्यालय राखी बैंकको केन्द्रीय कार्यालयसम्बन्धी सम्पूर्ण कामकारबाही गरेको, नाम परिवर्तन गरी युनिटी ग्रामीण विकास बैंक राखेको, बैंकको नेटवर्कको प्रयोग गरी अनुचित फाइदा उठाई ऋणी ग्रामीण गरिब महिलालाई युनिटी लाइफ इन्टरनेसनलको कार्यक्रमको सदस्य बनाएको, बैंकका संस्थापक/सञ्चालक युनिटी लाइफ इन्टरनेसनलको ठगी कार्यमा संलग्न रहेको देखिएकाले सञ्चालक समितिलाई निलम्बन गरी नियन्त्रणमा लिइएको थियो । घ वर्गको वित्तीय संस्थाका रूपमा मध्यमाञ्चलले २०५३ सालदेखि कारोबार सुरु गरेको हो ।