स्विस बैंकमा भारतीयको १ खर्ब १२ अर्ब

नयाँदिल्ली (एजेन्सी), श्रावण १० - धनाढ्य भारतीय नागरिक र ठूला उद्योगले स्विस बैंकमा २ अर्ब ५० करोड अमेरिकी डलर (करिब १ खर्ब १२ अर्ब भारु) जम्मा गरेको अध्ययनले देखाएको छ । स्विस केन्द्रीय बैंकलाई उल्लेख गर्दै अध्ययन सार्वजनिक भएपछि विदेशमा राखिएको पैसा विरुद्धको अन्दोलनमा नयाँ मोड आउने देखिन्छ ।

योग गुरु रामदेवले पछिल्ला महिनामा विदेशमा राखिएको रकम फिर्ता ल्याउनुपर्ने माग राख्दै आन्दोलन गरिरहेका छन् । प्रमुख प्रतिपक्षको सहयोगमा भइरहेको यो आन्दोलनमा सार्वजनिक भएको अध्ययनले थप ऊर्जा थप्ने विश्लेषक बताउँछन् । स्विस बैंकका प्रवक्ता वाल्टर मियरले २०१० को अन्त्यमा २ अर्ब ५० करोड डलर भारतीयका नाममा जम्मा रहेका उल्लेख गर्दै समाचार एजेन्सी प्रेस ट्रस्ट अफ इन्डियाले समाचार सार्वजनिक गरेको छ । यो रकममध्ये २ अर्ब १० करोड डलर सर्वसाधारण र कम्पनीको मुद्धतीका साथै साधारण बचत खातामा रहेको हो । बाँकी रकम लगानी व्यवस्थापक कम्पनीले भारतीय नागरिकका लागि लगानी गरेका छन् ।

भारतीय सर्वोच्च अदालतले केही समयअघि विदेशी बैंकमा रहेका अघोषित रकमबारे अनुसन्धान थाल्न निर्देशन दिँदै सरकारले 'ठूलो गल्ती' गरेको आदेश सुनाएको थियो । 'कालो धन' संज्ञा दिएर विपक्षी दलहरूले कंग्रेस नेतृत्वको सरकारले यस्तो कार्यलाई ढाकछोप गरिरहेको आरोप लगाएका छन् । कर नतिरी वा छल्नका लागि विदेशमा राखिएको यस्तो रकमले प्रधानमन्त्री मनमोहन सिंहको सरकारलाई समस्यामा पारेको छ ।

अध्ययनले २००८ देखि २०१० सम्म ५० करोड अमेरिकी डलर स्विस बैंकबाट अन्यत्र सारिएको देखाएको छ । बैंकले यसको कारण नखुलाए पनि सिंगापुर र दुबईका बैंकमा रकम सारिएको हुन सक्ने अनुमान छ । सिंगापुर र दुबईमा सरकारलाई छानबिन गर्न असजिलो हुने आशामा पैसा सारिएको अनुमान सरकारी अधिकारीले गरेका हुन् ।

समाचारमा प्रवक्ता वाल्टरले स्विट्जरल्यान्डका दुई ठूला बैंक युबिएस र क्रेडिट इस्युमा भारतीय नागरिकको धेरै रकम रहेको उल्लेख गरेका छन् । अमेरिकी वित्तीय विश्लेषण संस्था ग्लोबल फाइनान्सियल इन्टिगि्रटीले केही समयअघि २००४ देखि २००८ को बीचमा १९ अर्ब अमेरिकी डलर कर नतिरी भारत बाहिर गएको अनुमान अध्ययनमा गरेको थियो । गत वर्ष भारतले स्विट्जरल्यान्डसँग गरेको सम्झौताअनुसार दुई देशले वित्तीय जानकारी आदानप्रदान गर्न थालेका हुन् । यो सम्झौताकै कारण स्विट्जरल्यान्डको केन्द्रीय बैंकले भारतीय नागरिकले जम्मा गरेको रकमबारे जानकारी दिएको हो ।