काठमाडौ, जेष्ठ १० - राष्ट्र बैंकले तोकेको प्रावधान पूरा नगरे वित्तीय संस्थाको कार्यक्षेत्र घटाउन सक्ने व्यवस्था गरेको छ । केन्द्रीय बैंकले सोमबार जारी गरेको निर्देशिकाअनुसार निर्देशन अवज्ञा गरे विकास बैंक, वित्त कम्पनी र लघु वित्त कम्पनीको कार्यक्षेत्र घटुवा हुनेछ । यी संस्थामा पुँजी वृद्धिको समस्या देखिएपछि यस्तो निर्देशन ल्याइएको हो ।
पुँजीको समस्याबाहेक ५ वर्षदेखि निरन्तर नोक्सानीमा रहे, निर्देशन उल्लंघन गरे, तोकिएको जोखिम बेहोर्ने कोष कायम गर्न नसके केन्द्रीय बैंकले उल्लेखित संस्थालाई कार्य क्षेत्र घटाउन निर्देशन दिन सक्नेछ । घटुवा सोही वर्गमा रहने गरी हुनेछ ।
यस्तो घटुवाबाट राष्ट्रियस्तरका संस्थाको कार्य क्ष्ाेत्र क्षेत्रीयस्तरदेखि १ जिल्लासम्म र्झन सक्ने उल्लेख छ । ४ देखि १० जिल्लामा सञ्चालनमा रहेकालाई १ देखि ३ जिल्लासम्ममा सीमित गर्न सकिनेछ । ३ जिल्लामा सञ्चालित भने १ जिल्लामा झर्नेछन् । 'स्वीकृति लिएर बसेका तर पुँजी बढाउन नसक्नेका लागि निकास दिन यस्तो निर्देशन ल्याइएको हो,' राष्ट्र बैंकका प्रवक्ता भाष्करमणि ज्ञवालीले भने । विकास बैंक संघका अध्यक्ष झपट बोहोरा निर्देशन ल्याउनुअघि सरोकारवालासँग छलफल नभएको बताउँछन् । 'छलफल गरेर ल्याएको भए राम्राे हुन्थ्यो,' उनले भने, 'निर्देशनले समस्यामा परेका संस्थालाई सहयोग हुनेछ ।' चुक्ता पुँजी अभावको समस्या विकास बैंकहरूमा धेरै नदेखिएको उनी बताउँछन् । 'कुनै पनि संस्था खारेज गर्नु भन्दा कार्यक्षेत्र घटाएकै बेस हुन्छ,' उनले भने ।
केन्द्रीय बैंकले बर्सेनि ख र ग वर्गका संस्थालाई पुँजी र अन्य तोकिएको प्रावधान पूरा नगर्दा कारबाही गर्ने गरेको छ । पछिल्ला वर्षमा यस्तो कारबाहीको क्रम बढेको छ । आर्थिक वर्ष २०६७/०६८ मा मर्कन्टायल फाइनान्स वीरगन्ज, मल्टिपरपस फाइनान्स राजविराज र इन्भेस्टा फाइनान्स वीरगन्जलाई चुक्ता पुँजी समानुपातिक रूपमा नपुर्याएकाले कारबाही गरिएको छ । सोही अवधिमा यीबाहेक २५ विकास बैंक र फाइनान्स कम्पनीलाई विभिन्न शीर्षकमा कारबाही गरिएको छ । नयाँ निर्देशन जारी भएकाले आगामी वर्षबाट यस्ता संस्थाको कार्यक्षेत्र घटुवा गर्न सकिने छ ।
कार्यक्षेत्र घटाउने निर्देशन दिनुअघि राष्ट्र बैंकले संस्थालाई कारबाहीविरुद्ध सफाइको मौका दिने जनाएको छ । निर्देशनअनुसार तोकिएका प्रावधान पूरा गरेका संस्थाले आफैं कार्यक्षेत्र घटाउन सक्ने छन् । 'संकुचनका लागि निवेदन दिन सक्ने व्यवस्था गरिएको छ,' ज्ञवालीले भने, 'आवश्यक अध्ययनपछि मनासिव देखिए कार्यक्षेत्र घटाउन अनुमति दिनेछौं ।'
८४ विकास बैंक, ७९ वित्त कम्पनी र १९ घ वर्गका संस्था सञ्चालनमा छन् । पुँजीका आधारमा यस्ता संस्थालाई विभिन्न कार्यक्षेत्र तोकिएको हुन्छ । १ जिल्लामा सञ्चालन हुने विकास बैंकका लागि ५ करोड, ३ जिल्लाका लागि १० करोड, १० जिल्लाका लागि २० करोड र राष्ट्रियस्तरका लागि ६४ करोड चुक्ता पुँजी हुनुपर्छ ।
No comments:
Post a Comment