एचएन्डबीका ८ कर्मचारी निलम्बित

काठमाडौं, पुस ३ - एचएन्डबी डेभलपमेन्ट बैंकले आफ्ना ८ कर्मचारीलाई निलम्बन गरेको छ । गुड फर पेमेन्टे चेक काण्ड भएपछि कुलेश्वर शाखाका कर्मचारीसहित बैंकको प्रमुख सञ्चालन अधिकृत र वित्त (फाइनान्स) विभाग प्रमुख निलम्बनमा परेका हुन् ।

खातामा पैसा भएका व्यक्तिको नाममा जारी गरिने गुड फर पेमेन्ट चेकको अवैध कारोबार गरेर कुलेश्वर शाखा प्रमुख निरज नेपालले करोडौं रकम ठगी गरेको आरोप लागेको छ । जसमा बैंकका केही ग्राहकको पनि संलग्नता रहेको पुष्टि भएको छ । घटनाको अनुसन्धान बैंक आफैंले गरिरहेको छ । 'घटनामा बैंकको व्यवस्थापनमा रहेका अन्य वा सञ्चालकको कुनै संलग्नता देखिएको छैन,' राष्ट्र बैंक उच्च स्रोतले भन्यो, 'त्यो नदेखिएकाले भएको गल्ती सुधार गर्न सहयोग गरिरहेका हौं ।'

बैंकले गुड फर पेमेन्ट चेकबाट भएको अनियमिततामा कर्मचारीको थप संलग्नता हुन सक्ने अनुमान गर्दै निलम्बन गरिएको हो । 'अनुसन्धान चलिरहेकाले कर्मचारीलाई निलम्बनमा राखिएको हो,' बैंककी प्रमुख कार्यकारी अधिकृत जसोदा सैंजुले भनिन्, 'सञ्चालनमा त्रुटि देखिएकाले यस्तो गरेका हौं ।' राष्ट्र बैंकको अनुसन्धानबाट कुलेश्वर शाखाका प्रमुख नेपालले चेक जारी गरेर दुई व्यवसायी मनोज चौरसिया र जयकुमार यादवलाई बुझाएको देखिन्छ । दुवै व्यवसायीको खातामा रकम नभए पनि चेक जारी गरिएको थियो । काण्डका कारण बैंकले १७ करोडको हाराहारीमा नगद अभाव झेल्ने देखिएको छ । यसका साथै ५० करोड रुपैयाँको हाराहारीमा गुड फर पेमेन्टे चेकको दाबी बैंकलाई आएको छ । सैंजुले बैंकको अवस्था डराउनुपर्ने नरहेको र पर्याप्त तरलता रहेको बताइन् । बैंकको पुँजी र आयबाट घाटा सजिलै बेहोर्न सकिने उनले बताइन् । बैंकमा ७ अर्ब ५० करोड रुपैयाँको हाराहारीमा निक्षेप र ६ अर्बको कर्जा छ । पछिल्ला दिनमा बैंकमा रकम झिक्ने मात्र नभएर राख्नेको संख्या पनि बढ्न थालेको स्रोत बताउँछ । एचएन्डबीसँगै प्रहरीले पनि घटनाको अनुसन्धान गरिरहेको छ । गुड फर पेमेन्ट चेकबाट ऋण दिने संस्थाको संख्या अनुसन्धानबाट बढ्न सक्ने राष्ट्र बैंक स्रोत बताउँछ ।