सञ्चय कोषले मुद्दती खातामा रकम घटाउने

काठमाडौं, आश्विन १ - वाणिज्य बैंकहरूको प्रमुख निक्षेपकर्ता कर्मचारी सञ्चयकोषले मुद्दती खाताबाट रकम क्रमशः घटाउँदै लैजाने नीति लिएको छ । 

१ खर्ब १ अर्ब ५८ करोड रुपैयाँ कुल लगानी गरेको कोषले २५ दशमलव ३५ प्रतिशत बैंकहरूको मुद्दतीमा राखेको छ । 'कोषको स्रोतलाई पूर्वाधार विकासको क्षेत्रमा प्रवाह गरी बैंकको मुद्दती निक्षपप्रतिको निर्भरता क्रमशः कम गर्दै लैजाने रणनीति अवलम्बन गरिएको छ,' प्रशासक रमेशकुमार भट्टराईले भने । 

केही वर्षअघि वाणिज्य बैंकहरूको मुद्दती निक्षेपको ब्याजदर कम रहेकाले एकै क्षेत्रमा बढी निर्भर हुँदा भविष्यमा प्रतिफल कम हुन सक्ने कोषले विश्लेषण गरेको हो । आगामी ५ वर्षपछि कुल लगानीको ५० प्रतिशत रकम आवास तथा पूर्वाधार विकासमा लगाउने योजना कोषले सार्वजनिक गरेको छ । 

साथै जलविद्युत् विकासका लागि कोषले ५ वर्षमा ५० अर्ब र १० वर्षमा १ सय १० अर्ब रुपैयाँ लगानी गर्ने भएको छ । हाल कोषले माथिल्लो तामाकोसी, माथिल्लो सान्जेन जलविद्युत् परियोजना, रसुवागडी जलविद्युत् परियोजना, मध्य भोटेकोसी जलविद्युत् परियोजनालगायतमा ऋण दिन सम्झौता गरिसकेको छ । 

ऊर्जा विकासका लागि स्थापित जलविद्युत् लगानी तथा विकास कम्पनीमा कुल सेयरको १० प्रतिशत नबढ्ने गरी ३ अर्बसम्म संस्थापक सेयरमा लगानी गर्ने निर्णय कोषले गरिसकेको छ । 

कोषको स्वामित्व रहेको जग्गालाई उपयोग गर्दै १ वर्षभित्र ललितपुरको लगनखेलमा ९ तले व्यावसायिक भवन निर्माण गरिसक्ने योजना कोषको छ । चितवनको भरतपुर, काठमाडौंको टेकु, इटहरीलगायतका स्थानमा अपार्टमेन्ट र आवास बनाउने तयारीसमेत भएको छ । 

कोष ५० वर्ष पुगेको अवसरमा आयोजित कार्यक्रममा राष्ट्र बैंकका गभर्नर युवराज खतिवडाले पूर्वाधार लगानीलाई जोड दिँदै कम मूल्यको हाउजिङमा जान सुझाव दिए । 'मध्यमवर्गलाई लक्षित हाउजिङ अहिलको आवश्यकता हो,' खतिवडाले भने, 'यसका लागि कोषले सहयोग गर्न सक्छ ।' यसका साथै सिमेन्टलगायतका उद्योगमा पनि कोषले मुख्य लगानीकर्ता भएर ऋण प्रवाह गर्न सक्नेबारे छलफल भइरहेको उनले बताए ।

'सुरक्षित औद्योगिक क्षेत्रमा लगानी गर्न सकिन्छ,' उनले भने, 'उपभोक्तामा ठूलो रकम जानुभन्दा पुँजी निर्माणमा लगानी भएको राम्रो हुन्छ ।' कोषको लगानीलाई विविधीकरण गर्दै सेयर बजारमा समेत लगानी गर्न सकिने उनले बताए । 'सेयर मूल्य अहिले अन्तिम स्थानमा आएको छ,' गर्भनरले भने, 'अहिले लगानी गर्दा फाइदा नै हुने देखिन्छ ।' 

आर्थिक वर्ष २०६७/०६८ को अन्त्यसम्म कोषमा १ सय ६ अर्बको स्रोत रहेको छ । स्रोतको ९५ दशमलव ०७ प्रतिशत ऋण तथा लगानीमा र बाँकी स्थिर तथा चालु सम्पत्तिमा उपभोग भएको कोषले जनाएको छ । यही समयमा कोषमा ४ लाख ६० हजार सञ्चयकर्ता पुगेका छन् । गत आर्थिक वर्षमा ८ प्रतिशत ब्याजका साथै लेखापरीक्षण सकिएपछि थप १ दशमलव ५ प्रतिशत मुनाफा वितरण गर्ने निर्णय कोषले गरेको छ ।