बजारमा अस्वभाविक वृद्धि

काठमाडौं – कुनै ठोस कारण बिना सेयर बजार आकासिन थालेपछि धितोपत्र बोर्डले अध्ययन सुरु गरेको छ । बजारले तिव्र वृद्धि पाउनका लागि चाहिने कुनै पनि कारण नदेखिएका बेला बजार बढ्न थालेकाले अध्ययन सुरु गरिएको बोर्डका निर्देशक निरज गिरीले बताए । ‘यसरी बढ्न पर्ने कारण छैन’ उनले भने,‘यस्तो समयमा सचेत भएर लगानी गर्नु पर्छ ।’ लगानीकर्ताले बजार घट्दा वा बढ्दा विचार पु¥याएर निर्णय लिनुपर्ने उनी बताउछन् । ‘पाएको सुचनालाई प्रमाणित गरेर मात्र निर्णय लिनुपर्छ’ उनले भने ।

मुनाफा वृद्धि हुने शंकेत, नीतिगत परिवर्तन, वित्तिय विवरणको प्रकासनका समयमा बजारले सकारात्मक गति लिने गर्छ । संस्थागत लगानीकर्ता नभएकाले अस्वभाविक मूल्य वृद्धि गर्नका लागि चलखेल भएको हुनसक्ने शंका विश्लेषकले गरेका छन् । आर्थिक वर्ष अन्त्य हुन लागेको समयमा सेयर धितो कर्जा लिएकाले राहत पाउन मूल्य वृद्धि गर्न खोजेको हुन सक्ने सेयर दलाल बताउछन् ।

तर कारोबारको प्रकृती हेर्दा बजारले वास्तविक वृद्धि पाएको अनुमान पनि गर्न सकिने विश्लेषक रविन्द्र भट्टराई बताउछन् । ‘सक्ष्ँम कम्पनीको धेरै कारोबार भैरहेको छ’ उनले भने,‘दैनिक कारोबार रकम र संख्या बढ्दै गएको छ ।’ धेरै कम्पनीको मूल्य वास्तविकता भन्दा कम भएको विश्लेषण गर्दै खरिद गर्ने क्रम बढेको हुनसक्ने उनले बताए । ‘बढ्न थालेपछि नया“ लगानीकर्ताले पनि खरिद गर्ने प्रवृत्ती हाम्रो बजारमा छ’ उनले भने,‘त्यसले पनि बजार बढाएको हुनसक्छ ।’ बढेको तरलता, बजेटको प्राथमिकता, घटेको सोधानान्तर घाटा, रेमिटेन्सको वृद्धि लगायतले सकारात्मक असर परेको हुनसक्ने उनले बताए । 

गत शुक्रबारबाट सुरु भएको वृद्धिले विहिवारसम्म निरन्तरता पाएको छ । विहिवार ५ दशमलव ८६ प्रतिशतले बढेको नेप्से परिसूचक ३ सय ६४ बिन्दुमा पुगेको छ । परिसूचकमा देखिएको वृद्धिदरका कारण विहिवार पनि सर्किट ब्रेकर लगाएर बजार बन्द गरिएको छ । कारोबार रकममा पनि उल्लेख्य वृद्धि आएको छ । दिनभर ७ करोड १५ लाख रुपैया“को सेयर खरिद विक्री भएको थियो ।

कारोबार भएका सबै समूहमा वृद्धि आएको छ । जलविद्युत, वाणिज्य बैंक र अन्य समूहले सबैभन्दा धेरै वृद्धि पाएका छन् । जलविद्यूत ५० दशमलव ९१, वाणिज्य बैंक २३ दशमलव १९ र अन्य समूह २८ दशमलव १९ अंकले बढेको छ । विकास बैंक, वित्त, बिमा र उत्पादनमूलक समूह पनि बढेका छन् ।

राष्ट्र बैंकले सेयर धितो कर्जा सरल बनाउने, नेपाल टेलिकम, नागरिक लगानी कोष, कर्मचारी संचय कोष, बिमा संस्थान लगायतले सेयर खरिद गर्ने चर्चा चलेपछि सेयर बजारमा वृद्धि देखिन थालेको हो । चर्चा चलेपनि कुनै निर्णय भने भैसकेको छैन । आगामी साताको कारोबार हेरेर मात्र बजारको वृद्धि प्रवृत्तीबारे भन्न सकिने स्टक ब्रोकर एसोसिएसनका अध्यक्ष अन्जन पौडेल बताउछन् ।
आर्थिक वर्ष सकिन लागेकाले पुराना भुक्तानी फस्यौट भएर तरलतामा सुधार हुने बैंकरको अनुमान छ । यसबाहेक तरलताको समस्यामा परेका वित्तिय संस्थालाई राष्ट्र बैंकले बिभिन्न तरिकाबाट सहयोग गर्न थालेपछि सकारात्मक असर देखिएको छ ।