सेयर बजारमा दोहोरो वृद्धि

काठमाडौ, अषाढ ५ - मूल्य बढ्ने अनुमान -सिग्नल इफेक्ट) सँगै उच्च माग भएपछि सेयर बजारमा आइतबार दोहोरो अंकको वृद्धि देखिएको छ । पछिल्लो समयको सबैभन्दा ठूलो वृद्धिका कारण बजारमा तीन पटक सर्किट ब्रकेर -अस्वाभाविक रूपमा बजार घटबढ भए निश्चित समय कारोबार रोक्ने विधि) लगाइएको थियो ।

कारोबार गर्ने समयमा लागेको सर्किट ब्रेकरका साथै नेप्सेको सर्भर ह्याङ भएपछि आइतबार सेयरको कारोबार घटेको छ ।
बजार खुलेको एक घन्टामा परिसूचक ३ प्रतिशतभन्दा बढी वृद्धि भएपछि पहिलो सर्किट ब्रेकर लगाएर १५ मिनेट कारोबार रोकिएको थियो । त्यसपछि ४ प्रतिशत वृद्धि हुँदा ४५ मिनेट र ५ प्रतिशतको वृद्धि देखिएर दिनभरका लागि कारोबार स्थगित भएको थियो । दुवै कारणले सेयर खरिद बिक्री हुने समयमा कटौती भएपछि कारोबारमा असर परेको सेयर दलाल बताउँछन् ।
'नेप्सेको प्रणाली ह्याङ हुने क्रम पछिल्लो एक महिनामा धेरै बढेको छ,' एक सेयर दलालले भने, 'बजार खुलेको बेला पनि धेरै काम गर्न सकिएन ।' अर्थ मन्त्रालय, राष्ट्र बैंक र धितोपत्र बोर्डले सेयर बजारको सुधारका लागि विभिन्न काम अघि बढाएपछि बजारमा सकारात्मक असर परेको छ ।
लामो समयपछि आइतबार नेप्से परिसूचकमा ५ दशमलव ९ प्रतिशतको वृद्धि भएको छ । १५ दशमलव ४६ अंकले बढेर परिसूचक ३ सय १८ दशमलव ९९ अंकमा पुगेको छ । परिसूचकमा उल्लेख्य वृद्धि आए पनि कारोबार हुने कम्पनीको संख्या र रकम भने न्यून छ । ६१ कम्पनीको १ करोड ३५ लाख रुपैयाँ बराबरका सेयर खरिद बिक्री भएका थिए ।
सेयर बजार खुलेदेखि वृद्धि भएपछि खरिद चाप बढेको थियो । वृद्धि कायम रहने आशामा अधिकांशले सेयर होल्ड -बिक्री नगर्नु) गरेपछि कारोबार रकम थोरै भएको हो । 'खरिदको चापमा उच्च वृद्धि भएर परिसूचक बढेको हो,' अर्का सेयर दलालले भने, 'खरिद गर्न चाहनेले सेयर किन्न पाएनन् ।'
सुधारका कार्यक्रमको असर मात्र नभएर ठूला लगानीकर्ताले म्याचिङ -वास्तविक खरिद बिक्री नभई नामसारी मात्र गर्ने काम) गरेर पनि नेप्से बढेको हुन सक्ने अनुमान विश्लेषकको छ ।

वर्षको अन्त्यमा तिर्नुपर्ने कर्जालाई प्रभाव पार्न ठूला लगानीकर्ता म्याचिङ गरेर बजार मूल्य बढाइरहेको संकेतसमेत देखिएकाले नयाँ बजारमा प्रवेश गर्न चाहने सचेत हुनुपर्ने छ ।
 'सर्वसाधारण लगानीकर्ताले यस्तो समयमा विशेष ध्यान दिनुपर्छ,' विश्लेषक रविन्द्र भट्टराईले भने, 'प्राविधिक विश्लेषण गर्दा केही समय बजार बढ्ने देखिन्छ ।' यसका साथै धेरै कम्पनीको सेयर मूल्य अन्डरभ्यालु -वास्तविक भन्दा कम) भएकाले पनि बजार वृद्धि हुने संकेत गरेको उनले बताए । 
राष्ट्र बैंकले सेयर धितो कर्जामा पुनरावलोकन गर्ने चर्चापछि सेयर बजारमा वृद्धि देखिन थालेको छ । आइतबार नेपाल दूरसञ्चार कम्पनी र ठूला वाणिज्य बैंकको सेयर मूल्य बढेपछि परिसूचकले दोहोरो अंकको वृद्धि पाएको हो । कारोबार भएकामध्ये होटल समूहमा मात्र गिरावट आएको छ ।