काठमाडौ, फाल्गुन १२ - आर्थिक वर्षको ६ महिनामा शोधानान्तर घाटा ४ अर्ब ४३ करोड पुगेको छ । अघिल्लो वर्षको तुलनामा सुधार आए पनि यो घाटा एकै महिनामा १ अर्बको हाराहारीले बढेको छ । ५ महिनासम्म शोधानान्तर ३ अर्ब ३५ करोडले घाटामा थियो । ६ महिनामा वस्तु आयात केही घटेको छ । अघिल्लो वर्षको तुलनामा आयात १ दशमलव ६ प्रतिशतले घटेर १ खर्ब ८५ अर्ब पुगेको छ । अघिल्लो वर्ष यो ४० प्रतिशतले बढेको थियो । यस वर्ष सुन आयातमा कमी आएपछि यो घटेको छ । सुन बाहेकका सामान आयात भने १८ दशमलव ७ प्रतिशतले बढेको छ । निर्यात व्यापारमा भने केही सुधार देखिएको छ । ०६७/६८ को छ महिनामा कुल वस्तु निर्यात अघिल्लो वर्षको सोही अवधिको तुलनामा ५ दशमलव ९ प्रतिशतले बढेको छ । यो समयमा ३२ अर्ब ६३ करोड रुपैयाँ बराबरका वस्तुको निर्यात भएको थियो । अघिल्लो वर्षको सोही अवधिमा कुल वस्तु निर्यात ११ प्रतिशतले घटेर ३० अर्ब ८१ करोडमा सीमित भएको थियो । भारततर्फको निर्यात ९ दशमलव ७ र अन्य मुलुकको ० दशमलव ५ प्रतिशतले बढेको छ । विप्रेषण वृद्धिदर अघिल्लो वर्षको तुलनामा १ प्रतिशत विन्दुले कम छ । यस वर्ष ६ महिनामा १ खर्ब १८ अर्ब विप्रेषण भित्रिएको थियो । यसको वृद्धिदर हाल ११ दशमलव ५ प्रतिशत रहेको छ । विदेशी विनिमय सञ्चिति घट्ने क्रम रोकिएको छैन । ०६७ पुस मसान्तमा कुल विदेशी विनिमय सञ्चिति २०६७ असार मसान्तको २ खर्ब ६८ अर्बको तुलनामा ३ दशमलव २ प्रतिशतले घटी २ खर्ब ६० अर्बमा सीमित भएको छ ।
अर्कोतर्फ वाणिज्य बैंकको कर्जा र निक्षेप बीचको असन्तुलनमा उच्च वृद्धि आएको छ । आर्थिक वर्षको पहिलो ६ महिनामा कर्जा तथा लगानी ४५ अर्ब ९३ करोड रुपैयाँले र निक्षेप ३ अर्ब ७८ करोड रुपैयाँले मात्र बढेको छ । केही समयअघिसम्म विकास बैंक र वित्त कम्पनीको निक्षेपमा वृद्धि भइरहेको देखिए पनि हाल वृद्धिदर घटेको छ ।सहकारीमा जम्मा भएको रकमको भने यकिन तथ्यांक बैंकसँग छैन । निक्षेपमा न्यून वृद्धिका विपरीत निजी क्षेत्रको कर्जा ४० अर्ब ११ करोडले बढेको छ । निजी क्षेत्रमा प्रवाहित कर्जामध्ये उत्पादन क्षेत्रतर्फको कर्जा १५ अर्ब २० करोडले बढेको छ । अघिल्लो वर्षको सोही अवधिमा उक्त क्षेत्रतर्फको कर्जा ८ अर्ब ४३ करोड रुपैयाँले बढेको थियो । तरलताको अवस्थामा केही सुधार देखिए पनि सरकारी खर्च बढ्न नसक्दा सन्तोषजनक अवस्था छैन । समीक्षा अवधिमा नगद प्रवाहमा आधारित सरकारी खर्च ६ दशमलव ३ प्रतिशतले घटेको छ । यस अवधिमा ८० अर्ब ८५ करोड रुपैयाँ सरकारले खर्च गरेको छ । अघिल्लो वर्षको सोही अवधिमा यस्तो खर्च ३१ दशमलव ८ प्रतिशतले बढेको थियो । खर्चमा कमी आए पनि राजस्व संकलन भने बढ्ने क्रममा छ । आर्थिक वर्ष २०६७/६८ को छ महिनामा सरकारको राजस्व परिचालन १४ दशमलव ६ प्रतिशतले बढेर ९१ अर्ब ३३ करोड रुपैयाँ पुगेको छ ।
महँगी पनि बढ्ने क्रममा रहेको छ । आर्थिक वर्ष २०६७/६८ को पुस महिनामा वाषिर्क विन्दुगत उपभोक्ता मुद्रास्फीति ११ दशमलव ३ प्रतिशत छ । अघिल्लो वर्षको सोही अवधिमा यस्तो मुद्रास्फीति १० दशमलव ७ प्रतिशत थियो । खाद्य तथा पेय पदार्थ समूहमा सबैभन्दा धेरै मूल्य वृद्धि भएको छ । यो समूहको मूल्य सूचकांक १७ दशमलव ६ प्रतिशतले बढेको छ । सबैभन्दा धेरै मूल्य बढ्ने खाद्य पदार्थमा तरकारी रहेको छ । यसको वृद्धिदर ६७ दशमलव ४ प्रतिशत रहेको केन्द्रीय बैंकले जनाएको छ । अघिल्लो वर्ष यो ३० प्रतिशतले मात्र बढेको थियो । आयातित वस्तुमा सबैभन्दा बढी इन्धनको मूल्य वृद्धि भएको छ । पेट्रोलियम पदार्थ र कोइलाको मूल्य १७ दशमलव ९ प्रतिशतले बढेको छ ।
No comments:
Post a Comment