७ महिनामा नेप्से कारोबार रकम ६२ प्रतिशत घट्यो

काठमाडौ, फाल्गुन १५ - आर्थिक वर्षको ७ महिनामा स्टक एक्सचेन्जमा हुने दैनिक कारोबारमा उच्च गिरावट आएको छ । यस समयमा दैनिक हुने कारोबारको रकम ६१ दशमलव ७६ प्रतिशतले घटेको छ ।

यस वर्षको ७ महिनामा औसत दैनिक कारोबार २ करोड ५० लाख कायम भएको छ । अघिल्लो वर्षको सोही अवधिमा यो रकम ६ करोड ५० लाख रुपैयाँ थियो ।

सेयर बजारमा तरलता अभाव, लगानीको स्रोत, राजनीतिक अस्थिरतालगायतले असर गरेको विश्लेषक बताउँछन् । 'राजनीतिक अस्थितरताले विभिन्न क्षेत्रलाई असर गरेको छ,' सेयर बजार विश्लेषक जगदीश अग्रवालले भने, 'यसका साथै तरलता अभावले पनि लगानीको वातावरण बन्न दिएको छैन ।'

यसै वर्ष नेपाल स्टक एक्सचेन्जको परिसूचक नेप्से चारपटक चार सय अंकभन्दा तल झरिसकेको छ ।

सूचीकृत कम्पनीले वाषिर्क प्रतिफल दिइसकेपछि सामान्यता बजार घट्ने गरेको अर्का विश्लेषक रविन्द्र भट्टराई बताउँछन् । यसका साथै बजारमा मागको अवस्थामा सुधार आउन नसकेकाले पनि ओरालो लाग्ने क्रम नरोकिएको उनले बताए । 'बजारमा सूचीकृत हुने कम्पनीको संख्या बढ्दै गएको छ भने माग बढ्न सकेको छैन,' उनले भने । मुख्य रूपमा संस्थागत लगानीकर्ता नभएकाले यस्तो समस्या आइरहेको उनले बताए ।

सेयरको मूल्य र परिसूचक ओरालो लाग्ने क्रमसँगै बजार पुँजीकरण पनि घटिरहेको छ । हाल बजार पुँजीकरण ३ सय ५४ अर्ब रहेको छ । अघिल्लो वर्षको यही अवधिमा ३ सय ८३ अर्ब थियो । सूचीकृत कम्पनीको संख्या १ सय ९७ पुगेको छ ।