काठमाडौं, मंसिर ३ -
एनसीसी बैंकको प्रबन्ध सञ्चालकका रुपमा काम गर्दा प्रकृया नपुर्याइ ऋण
दिएको देखिएपछि राष्ट्र बैंकले पुष्पराज राजकर्णिकारलाई ५० हजार रुपैयाँ
जरिवाना गरेको छ । राजकणिर्कार राष्ट्र बैंकमा डेपुटी गभर्नरको पदावधि
सकिएपछि एनसीसी बैंकसँग आवद्ध भएका थिए । एनसीसीमा उनले करिब ७ महिना काम
गरेका थिए । राष्ट्र बैंकको डेपुटी गभर्नरबाट अवकाशपछि अन्य वित्तीय
संस्थामा गएर कारबाहीमा पर्ने राजकणिर्कार दोस्रो हुन् ।
एनसीसी बैंकबाट प्रवाह भएको दुई ऋणमा अनियमितता भएको राष्ट्र बैंकको
अनुसन्धानमा देखिएको छ । 'करिब ३ करोड रुपैयाँ बराबरको ऋण प्रवाह हुँदा
अनियमतिता देखिएको हो,' केन्द्रीय बैंक स्रोतले भन्यो, 'पछिल्लो समय उक्त
ऋण बैंकले असुलउपर गरेको देखिन्छ ।' प्रक्रिया नपुर्याई अर्का बैंकका
अध्यक्ष र एक व्यावसायिक समूहलाई ऋण प्रवाह भएको छ ।
ऋण असुलउपर भए पनि प्रक्रिया मिचेर प्रवाह भएकाले कर्जा दिन अनुमति दिने
राजकणिर्कारलाई जरिवाना गरिएको हो । केही दिनअघि राष्ट्र बैंकले
राजकणिर्कारलाई पत्र काटेर किन कारबाही नगर्ने भनी प्रश्न गरेको थियो ।
'उत्तर चित्त बुझ्दो नआएपछि कारबाही गरिएको हो,' स्रोतले भन्यो ।
तर राजकणिर्कारले भने कारबाहीबारे आफूलाई जानकारी नभएको प्रतिक्रिया दिए ।
'यसबारेमा मलाई राष्ट्र बैंकले स्पष्टीकरण सोधेको थियो र त्यसको जवाफ
दिइसकेको छु,' उनले कान्तिपुरसित भने, 'तर जरिवानाको बारे मलाई जानकारी छैन
।'
एनबी समूहको प्रमुख लगानी रहेको एनसीसी बैंकमा पनि सञ्चालकको दबाबमा भएका
अनियमितता एकपछि अर्को गर्दै बाहिर आइरहेका छन् । सोही समूहले प्रवर्द्धन
गरेको श्रीलंका मर्चेन्ट बैंकिङ एन्ड फाइनान्स लिमिटेडमा भएको अनियमतिता
बाहिर आएपछि पछिल्लो समय प्रहरीले समेत छानबिन थालेको छ । श्रीलंका
मर्चेन्ट र नेपाल बंगलादेश बैंक गाभिइसकेपछि अनियमितता बाहिर आएको थियो ।
श्रीलंका मर्चेन्ट गाभिनुअघि गरिएको कर्जा प्रवाह सञ्चालकको निर्देशनमा
भएको र असुल उपर हुन असहज देखिएको राष्ट्र बैंकको छानबिनमा देखिएको छ ।
केही समयअघि एनबी बैंकले उक्त मर्चेन्ट बैंकबाट कर्जा लिएर नतिरेका
व्यक्तिको नाममा ३५ दिने सूचना सार्वजनिक गरेको छ ।
