काठमाडौं, माघ २२ - ग्लोबल बैंक र आइएमई फाइनान्सियल इन्सिटिच्युसनले गाभिन (मर्जर) का लागि सौद्धान्तिक सहमति गरेका छन् । सहमतिमा दुवै संस्थाका प्रतिनिधिले शुक्रबार हस्ताक्षर गरेका थिए । गाभिएपछि बन्ने संस्थाको नाम ग्लोबल आइएमई बैंक लिमिटेड रहने गरी सम्झौता भएको छ । 'आइएमई र ग्लोबल गाभिएर ग्लोबल आइएमई बैंक नाम रहने गरी सम्झौता गरिएको छ,' ग्लोबल बैंकका अध्यक्ष चन्द्र ढकालले कान्तिपुरसित भने । नेटवर्थको आधारमा एक बराबर एक सेयर स्वामित्व रहने गरी मर्जरको तयारी गरिएको छ । 'एक बराबर एक अनुपातमा मर्ज गर्ने तयारी भएको हो,' आइएमईका एक उच्च अधिकारीले भने ।
गाभिएपछि २०७० सालमा चुक्ता पुँजी २ अर्ब रुपैयाँ पुर्याउने गरी अनुमति लिएको ग्लोबलको प्रावधान पूरा गर्न सजिलो हुने भएको छ । यसपछि संस्थाको चुक्ता पुँजी मात्रै करिब २ अर्ब रुपैयाँ पुग्नेछ । यसमा सञ्चिति जोड्दा २ अर्ब रुपैयाँ नाघ्नेछ । बैंकका प्रमुख कार्यकारी अधिकृत रत्नराज बज्राचार्यका अनुसार असारसम्ममा सबै प्रक्रिया पूरा हुनेछ ।
आइएमई फाइनान्सको प्रमुख संस्थापक सेयरधनीमा इन्टरनेसनल मनी एक्सप्रेस -आइएमई) प्रालि छ । गत आर्थिक वर्षको प्रतिवेदनअनुसार चन्द्र ढकाल प्रतिनिधि रहेको आइएमई प्रालिको फाइनान्समा ५ लाख ४० हजार कित्ता सेयर छ । सोही संख्यामा योगेश्वर शर्मा ढकाल प्रतिनिधि रहेको वल्र्डवाइड इन्भेस्टमेन्ट प्रालिको पनि सेयर स्वामित्व छ । बैंकमा पनि आइएमई प्रालिको १० दशमलव ५१ प्रतिशत र वल्र्डवाइड इन्भेस्टमेन्ट प्रालिको ९ दशमलव २९ प्रतिशत सेयर स्वामित्व छ ।
अब यी दुई संस्थाले औपचारिक मर्जरका लागि राष्ट्र बैंकबाट मर्जरका लागि अनुमति लिनुपर्नेछ । दुवै संस्थाको वाषिर्क साधारणसभाबाट उपयुक्त संस्थासँग मर्जरमा जाने प्रस्ताव पारित गरिसकेका छन् । राष्ट्र बैंकले एकै प्रवर्द्धक रहेका संस्थाहरूलाई बाध्यकारी मर्जरमा लैजाने संकेत दिएपछि करिब डेढ महिनाअघिबाट दुई संस्था गृहकार्यमा जुटेका थिए । सिधै निर्देशन जारी नगरिए पनि पछिल्लो समयमा यस्ता संस्थाका प्रतिनिधि बोलाएर राष्ट्र बैंकका उच्च अधिकारीहरू मर्जरमा जान सुझाव दिइरहेका छन् । स्रोतका अनुसार वाणिज्य बैंकदेखि फाइनान्स कम्पनीसम्मका प्रवर्द्धकलाई आफैं मर्जरमा जाने सुझाव दिइँदै आएको छ ।
फाइनान्सको कर्पोरेट कार्यालयसहित २४ शाखा र ४ एक्सटेन्सन काउन्टर छन् । बैंकका ३२ शाखा छन् ।
गाभिएपछि संस्थाको शाखा संख्या ६० पुग्नेछ । यस आर्थिक वर्षको पहिलो त्रैमासिक वित्तीय विवरणअनुसार ग्लोबल बैंकको चुक्ता पुँजी १ अर्ब ६० करोड रुपैयाँ छ । बैंकको करिब १६ करोड रुपैयाँ सञ्चिति छ । उक्त अवधिमा बैंकले ५ करोड ७० लाख रुपैयाँ नाफा गरेको छ ।
निस्क्रिय कर्जा २ दशमलव ७६ प्रतिशत छ । विवरणअनुसार बैंकले १६ अर्ब ३२ करोड निक्षेप संकलन र १३ अर्ब ४४ करोड रुपैयाँ लगानी गरेको छ ।
आइएमईको चुक्ता पुँजी करिब ४२.३५ करोड रुपैयाँ छ । असोज मसान्तमा १ करोड ५३ लाख रुपैया नाफा कमाएको फाइनान्समा २ दशमलव २३ प्रतिशत निस्त्रिmय कर्जा छ । फाइनान्समा ४ अर्ब ५३ करोड निक्षेप र ३ अर्ब ६२ करोड रुपैयाँ लगानी छ ।
प्रवर्द्धक एकै परिवारका वा नाता पर्ने भएका बैंक तथा वित्तीय संस्थालाई मर्जरमा जान अन्यभन्दा बढी प्रोत्साहन दिने गरिएको राष्ट्र बैंक स्रोतले बतायो । 'अन्य केही बैंकलाई पनि हामीले मर्जरमा जान सुझाव दिइसकेका छौं,' राष्ट्र बैंक स्रोतले भन्यो । राष्ट्र बैंकले गरेको एक अध्ययनअनुसार वाणिज्य बैंक र फाइनान्स कम्पनीमा एकै पारिवारिक सम्बन्ध भएका प्रवर्द्धकको संख्या बढी छ । 'ठूलो हिस्सा नरहे पनि सम्बन्ध स्थापित भएका धेरै प्रवर्द्धक छन्,' स्रोतले भन्यो ।
No comments:
Post a Comment